எங்களைத் தற்குறிகள் என்று சொல்பவர்களுக்காக.

"தமிழ்நாட்டின் தலைநகரம் சென்னை."

"நண்டு படத்தை இயக்கியவர் மகேந்திரன்."

மேற்காணும் இரண்டு கூற்றுகளும் உண்மைகள் (facts).  

அழகம்பாளையம் தனசேகரிடம் கேட்டாலும் அதைத்தான் சொல்லுவார், அஞ்சானூர் தமிழன்புவிடம் கேட்டாலும் அதைத்தான் சொல்லுவார்.

(தமிழ்நாட்டின் தலைநகரம் மதுரை என்று தவறாகச் சொல்பவர்களும் இருப்பார்கள். அதுவும் உண்மையில்லை. தலைநகரம் சென்னை என்று தெரிந்தும் ஒருவர் அப்படிச் சொன்னால் அது பொய்.)

 

இன்னும் இரண்டு கூற்றுகள்.

"சென்னை ஓர் அழகான ஊர்."

"நண்டு படம் நன்றாக இருக்காது."

இந்த இரண்டு கூற்றுகளும் கருத்துகள் (opinions).

தனசேகரைப் பொறுத்தவரை சென்னை அழகான ஊராக இருக்கலாம். ஆனால், தமிழன்பு அதை ஓர் அழகற்ற ஊரென நினைக்கலாம். 

அதேபோல்தான் நண்டு படம் குறித்த கருத்தும். 

...

பொதுவாக வாக்குவாதங்களில் தத்தம் கருத்துகளைச் சொல்பவர்கள் செய்யும் தவறுகள் இரண்டு.

1) அவை தம்முடைய கருத்துகள் மட்டுமே என்பதையோ, தன்னுடைய கருத்து என்பதாலேயே அது உண்மையாக இருக்க வேண்டிய அவசியம் இல்லை என்பதையோ ஏற்க மறுப்பது.

2) கருத்துகளை நிறுவ உண்மைகளைச் சொல்லாமல், மேலும் தங்களுடைய கருத்துகளையே சொல்வது.

...

எதற்கு இந்தப் பீடிகை?

சமீப காலமாக தமிழ்நாட்டின் சோஷல் மீடியாக்களில் அடிக்கடி புழங்கும் வார்த்தை - தற்குறி. 

நடிகராக இருந்து அரசியல் கட்சி தொடங்கியிருக்கும் திரு. விஜய் அவர்களின் கட்சிக்கு ஆதரவு தெரிவிப்பவர்கள் அனைவரும் தற்குறிகள் என்பது அநேகரின் கருத்து. அது அவர்களின் சொந்தக் கருத்து மட்டுமே. அது உண்மையாகாது‌. ஆனால், அவ்வாறு கருத்து தெரிவிக்கும் எவரும் "இது என்னுடைய கருத்து மட்டுமேயன்றி உண்மையில்லை" என்று சொல்லாததால் பலரும் அதை உண்மை என்றே நினைக்கிறார்கள். 

தம்மை அறிவாளிகளாகக் காட்டிக் கொள்ள நினைக்கும் pseudo-intellects பலரும் அந்தக் கூற்றை உண்மை என்றே வாதிடுகிறார்கள். அவர்களின் கருத்துக்கு மாற்றுக் கருத்து தெரிவித்தால் "உண்மை கசக்கும்" என்று கொக்கரிக்கிறார்கள். 

அதனால், அவர்களில் ஒருவர் வெளியிட்டிருக்கும் கருத்தை எடுத்து அதை உங்கள் முன்னால் உடற்கூறாய்வு செய்ய நான் விரும்புகிறேன்.

...

இந்தக் கட்டுரையிலும் எத்தனை சதவீதம் உண்மை, எத்தனை சதவீதம் என்னுடைய சொந்தக் கருத்து என்று நீங்கள் ஆராய்ந்து பார்த்துத் தெரிந்து கொள்ளலாம். மிக எளிதாக இந்தக் கட்டுரையை ஏதாவது ஒரு செயற்கை நுண்ணறிவு செயலியிடம் கொடுத்துக் கூட நீங்கள் அதைக் கேட்டுத் தெரிந்து கொள்ளலாம்.

...

திரு. விநாயக முருகன் என்றொருவர் தனது முகநூலில் வெளியிட்டிருக்கும் கருத்தை அப்படியே தருகிறேன். 

இந்த மாதிரி கொட்டை எழுத்துகளில் இருப்பவை திரு. விநாயக முருகன் எழுதியது.

அதற்கு கீழே இப்படி இருக்கும் மெலிந்த எழுத்துகள் நான் எழுதுவது.

...

 

தற்குறிகளை தற்குறி என்று சொல்லக்கூடாது என்று சமஸ் சொல்கிறார்.

நேர்கூற்றை அயற்கூற்றாக மாற்றி எழுதி இருக்கிறார் (Direct Speech to indirect Speech).

திரு. சமஸ் அவர்கள் சொல்லும்போது, "த.வெ.க. கட்சியை ஆதரிப்பவர்களை தற்குறிகள் என்று சொல்லக்கூடாது" என்றுதான் சொல்லியிருப்பார். த.வெ.க. ஆதரவாளர்கள் தற்குறிகள் என்பது திரு. விநாயக முருகனின் சொந்தக் கருத்து (opinion). அது உண்மையில்லை (not a fact). 

பூவை பூ என்று சொல்லாமல் புஷ்பம் என்றா சொல்லமுடியும்?

பரிபூரண உண்மைதான்‌.

ஒருவர் ஒரு அரசியல் சிந்தாந்தத்தை கொள்கையை முன்வைக்கிறார். அதில் நமக்கு உடன்பாடு இருக்கலாம். மாறுபாடு இருக்கலாம். உடன்பாடு இருப்பவர்கள் அந்தக்கட்சிக்கு ஒட்டு போடுவார்கள். இல்லையென்றால் ஓட்டு போடமாட்டார்கள். 

உண்மைதான்.

த.வெ.க என்ற கட்சியை எடுத்துக்கொள்ளலாம்.

சரி. எடுத்துக் கொள்ளலாம்.

அது முதலில் ஒரு கட்சியே இல்லை. அது ஒரு ரசிகர் மன்றம். 

இது உண்மையில்லை. இதை அவரது கருத்து என்றுகூடச் சொல்ல முடியாது. ஆரம்பத்தில் பார்த்தோமே, "தமிழ்நாட்டின் தலைநகரம் மதுரை" என்றொரு கூற்று. அதைப் போன்றதொரு பொய்யான கூற்றுதான் இது. 

இந்தியத் தேர்தல் ஆணையத்தில் முறைப்படி பதிவுசெய்யப்பட்ட ஒரு கட்சியை எப்படி இவர் கட்சி இல்லை என்று சொல்ல முடியும்?

அது இன்னும் ஒரு மாநிலக் கட்சி இல்லை, தேசியக் கட்சி இல்லை என்பது உண்மை (fact).

"அது ஒரு நல்ல கட்சி இல்லை" என்று சொன்னால் கூட அதை ஒரு கருத்தாக (opinion) அங்கீகரிக்கலாம். இந்தக் கூற்று பொய்யென்று தெரிந்தும் அதை உண்மை போல் சொல்லும் நேர்மையில்லாத கூற்று.

தமிழ்நாடு முழுக்க விஜய்க்கு ரசிகர்கள் இருக்கிறார்கள்.

உண்மைதான்.

அந்த ரசிகர்களை நம்பி தேர்தலில் இறங்கிவிட்டார்.

இது உண்மையும் இல்லை. கருத்தும் இல்லை. இது ஒரு ஊகம்.

"திரு. விநாயக முருகன் அவர்கள் ஆளுங்கட்சியிடம் பணம் வாங்கிவிட்டு இப்படி எழுதியிருக்கிறார்" என்று நான் சொன்னால் அது எப்படி என்னுடைய ஊகம் ஆகுமோ, அது போலவே இது அவரது ஊகம்.

அவர் பணம் வாங்கினாரா இல்லையா என்பது அவருக்குத்தான் தெரியும். அதுதான் உண்மையென்று நான் சொல்ல முடியாது. அதைப் போலவே, திரு. விஜய் அவர்கள் மனதில் என்ன நினைத்து அரசியலில் இறங்கினார் என்பது திரு‌. விஜய் அவர்களுக்குத்தான் தெரியும். அது திரு‌. விநாயக முருகனுக்குத் தெரியாது.  

விஜயகாந்துக்கும் ரசிகர்கள் இருந்தார்கள். ஆனால் விஜயகாந்த் அவர் ரசிகர்களை நம்பவில்லை. 

இந்தக் கூற்றை திரு. விநாயக முருகன் அவர்கள் அமரர் திரு. விஜயகாந்த் அவர்களைப் பாராட்டும் விதமாக எழுதுகிறார். ஆனால், அவர் எழுதிய கூற்றை அப்படியே வாசித்தால் அது ஓர் அவதூறு. திரு. விஜயகாந்த் அவருடைய இரசிகர்களை மட்டும் நம்பவில்லை என்று அவர் சொல்ல வருவதாக எடுத்துக் கொள்கிறேன்‌.

மக்களை நேரடியாக சந்தித்து ஓட்டு கேட்டார்.

திரு‌. விஜய் அவர்களும் மக்களை நேரடியாக சந்தித்து ஓட்டு கேட்டார் என்பது செய்தி ஊடகங்களில் காட்சிகளாகப் பதிவானதோர் உண்மை.

அம்மா கிரியேஷன்ஸ் டி.சிவா சாய் வித் சித்ராவில் இப்படி சொன்னார். நாங்க எல்லாரும் விஜிக்கு நெருங்கின நண்பர்கள். விஜி கட்சி தொடங்கினப்ப அவர்கிட்ட சீட் கேட்டு போனோம். இல்ல சரிப்பட்டு வராது. உங்க வேலையை நீங்க பாருங்க. எங்க வேலையை நாங்க பார்க்கிறோம் என்று சொன்னார்.

அந்த நேர்காணலை நான் பார்த்தேன். அதில் சிலவற்றை திரு. விநாயக முருகன் அவர்கள் சொல்லாமல் விட்டிருக்கிறார்.  முதலில் அதை உள்ளது உள்ளபடி முழுதாகப் பார்ப்போம்.

திரு. சித்ரா லட்சுமணன்: விஜயகாந்த்த பொறுத்தவரைக்கும், சினிமாவுல மட்டும் இல்லாம, அரசியல்லயும் மிகப் பெரிய சாதனைகளப் பண்ணவரு. எந்தக் காலகட்டத்திலயாவது, "சிவா அரசியலுக்கு எங்கூட வந்துருங்க" அப்படினு  அழைச்சிருக்காரா அவரு? 

திரு. சிவா: அவரு அழைக்கல. நானு செல்வமணியெல்லாம் போயி கேட்டோம். தனித்தனியா கேட்டோம். 

திரு. சித்ரா லட்சுமணன்: ம்ம்.

திரு. சிவா: நாங்க... கட்சி ஆரம்... எப்புடி வரணும்னுட்டு.

திரு. சித்ரா லட்சுமணன்: ம்ம்.

திரு. சிவா: அவரு ஒரே வார்த்த சொன்னாரு. 

திரு. சித்ரா லட்சுமணன்: ம்ம்.

திரு. சிவா: உங்க வேலைய நீ பாரு. என் வேலைய நான் பாக்கறேன். 

திரு. சித்ரா லட்சுமணன்: ம்ம்.

திரு. சிவா: இன்னும் கொச்சையா சொன்னாரு‌. இந்த சினிமாக் காரங்கெல்லாம் பின்னாடி வருவாங்க, கட்சிய வளர்ப்பாங்கனு எல்லாம் நா கட்சிய ஆரம்பிக்கல.

திரு. சித்ரா லட்சுமணன்: அடடா!

திரு. சிவா: என்னையும் மக்களையும் நம்பி ஆரம்பிச்சு இருக்கேன், அரசியல.

திரு. சித்ரா லட்சுமணன்: (சப்புக் கொட்டி மெச்சுகிறார்)

திரு. சிவா: நீ எங்கூட இருக்கறனு சொல்லி உனக்கு நாலு வாய்ப்பு கெட்டுப் போகும். அதெல்லாம் நீ செய்யாத.

திரு. சித்ரா லட்சுமணன்: ம்ம்.

திரு. சிவா: நா வந்து... சினிமா போதும்னு முடிவெடுத்துட்டு அடுத்த வேலைக்கு வந்துருக்கேன். நீ சினிமா போதும்னு முடிவெடுத்துட்டு அப்பறம் இங்க வா. 

திரு. சித்ரா லட்சுமணன்: ம்ம்.

திரு. சிவா: ரெண்டையும் செய்ய முடியாதுன்னுட்டாரு.

திரு. சித்ரா லட்சுமணன்: ம்ம்.

திரு. சிவா: அப்புடித்தா நெருங்கிய நண்பர்கள் கேட்ட போதெல்லாம் அவுரு வந்து... சினிமால இருந்து யாரு கேட்டபோதும் அவரு என்கரேஜே பண்ணல. எல்லாரையுமே வராதீங்கன்னே சொல்லிட்டாரு. அதனாலதா நீங்க பார்த்தீங்கன்னா, ஒரு... யாருமே சினிமால இருந்து known யாருமே உள்ள வரல. ஆனா, நெறையா பேரு கேட்டாங்க. யாரையும் வேண்டான்னுட்டாரு. ஏன்னா அவரு ஒரு சினிமா கும்பல கூட்டிட்டு உள்ள வர்றாருன்ற இமேஜ் அவரு குடுக்கவே இல்ல. கடைசி வரைக்கும் சோலோவா... விஜயகாந்த்.

இதுதான் அந்த உரையாடல். இதிலே திரு. சிவா அவர்கள் தான் எப்படி கட்சியில் இணைவது என்று கேட்டதாகத்தான் சொல்லியிருக்கிறார். ஆனால், அவர் "சீட்"  கேட்டதாக திரு. விநாயக முருகன் அவர்கள் எழுதி இருக்கிறார். கட்சியில் இணைந்து வேலை செய்வது என்பது வேறு. "சீட்"  பெறுவது என்பது வேறு. இது திரு. சிவா மீதான திரு. விநாயக முருகனின் அவதூறு. 

மேலும், அமரர் திரு. விஜயகாந்த் அவர்கள் சொன்னதாக திரு. சிவா சொன்ன ஒன்றை திரு. விநாயக முருகன் இலாவகமாகத் தவிர்த்துள்ளார். 

சினிமா போதும் என்று முடிவெடுத்துவிட்டு அரசியலுக்கு வருவது. அதையேதான்  திரு. விஜய் அவர்களும் செய்துள்ளார். அதைப்பற்றி நம் எழுத்தாளர் ஏன் குறிப்பிடவில்லை என்று விளக்கினால் நலம்.

மேலும், திரு. விஜயகாந்த் அவர்கள் சொன்னது என்ன? "நான் சினிமாக்காரர்களை நம்பி வரவில்லை. என்னையும் மக்களையும் நம்பி வந்தேன்." 

திரு. விஜய் அவர்களின் இரசிகர்கள் "மக்கள்" என்ற வரையறைக்குள்தான் அடங்குவார்கள். ஆக, திரு. விஜயகாந்த் சொன்னதையே திரு‌. விஜயும் செய்ததாகத்தான் திரு. விநாயக முருகனும் சொல்கிறார்.

மேலும், திரு. விஜயகாந்த் எப்படி சினிமாவிலிருந்து யாரையும் அழைத்து வராமல் தான் மட்டும் தனியாக வந்தாரோ, அதே போலத்தான் திரு. விஜய் அவர்களும் தனியாக வந்திருக்கிறார். வீதியில் இறங்கி அவருக்காக பிரச்சாரம் செய்யும் நடிகர்கள் அவரிடம் அனுமதி பெற்று கட்சியில் சேர்ந்தபின் செய்யவில்லை.

கட்சி தொடங்கிய முதல் விஜய் எந்த பிரச்சாரத்திலும் அந்தக்கட்சியின் கொள்கையை தெளிவாக சொல்லவில்லை.

அக்டோபர் 27, 2024. 

விக்கிரவாண்டி சாலையில் நடந்த வெற்றிக் கொள்கைத் திருவிழாவில் திரு. விஜய் அவர்கள் தமிழக வெற்றிக் கழகத்தின் கொள்கைகளை சொன்னார். 

ஊழல் மற்றும் பாசிசத்தை அழித்தல், மதச்சார்பற்ற சமூக நீதி, சமத்துவம் ஆகியவையே தமது கொள்கைகளென அறிவித்து கொள்கைத் தலைவர்களையும் அறிவித்தார். அந்த வீடியோ இன்னும் யூட்யூபில் உள்ளது. 

பிறப்பொக்கும் எல்லா உயிர்க்கும் என்று சொல்கிறார்கள். இது எப்படி கொள்கையாகும்?

'பிறப்பால் யாரும் உயர்ந்தவர் தாழ்ந்தவர் இல்லை'  என்பது கொள்கை இல்லையென்றால், 'கொள்கை' என்றால் என்னவென்று திரு. விநாயக முருகன் அவர்கள் உதாரணத்தோடு விளக்க வேண்டும். 

ஆளும்கட்சி திமுக என்னென்ன தவறுகள் செய்தது? 

அதை நான் எப்படி சரிசெய்வேன். இப்போது என்னென்ன போதாமைகள் உள்ளன. அதை எப்படி தீர்ப்பேன். எனது ஆட்சியில் என்ன திட்டங்கள் கொண்டுவருவேன் என்று சொல்லவேண்டும். அதையும் சொல்லவில்லை.

பெண்களுக்கு பாதுகாப்பு தரவில்லை என்றும், லஞ்சம் மற்றும் ஊழல் குறித்த குற்றச்சாட்டுகளும் த.வெ.க-வால் வைக்கப்பட்டுள்ளன. 

த.வெ.க. ஆட்சிக்கு வந்தால், பெண்கள் பாதுகாப்புக்கென சிறப்புச் சட்டம் இயற்றப்படும் என்று சொல்லப்பட்டிருக்கிறது.

த.வெ.க. தேர்தல் அறிக்கையில் MSME-யில் செயற்கை நுண்ணறிவு தொழில்நுட்பம் அறிமுகப் படுத்தப்பட்டு நவீனமயமாக்கப்படும் என்று சொல்லப் பட்டிருக்கிறது. (இது நான் சம்பந்தப்பட்ட வாக்குறுதி. MSME-யில் பதிந்து ஒரு சுயதொழில் செய்துவருகிறோம்.)

இந்த விஷயத்தில் நாம் தமிழர் பரவாயில்லை. சாலைகளின் டிவைடர் நடுவே சோலார் பேனல் வைப்பேன். மாற்று எரிசக்தி கொண்டுவருவேன் என்றாவது சொல்லமுடிந்தது.

த.வெ.க. என்ன வாக்குறுதிகள் தந்துள்ளனர் என்று சொல்லிவிட்டதால், இது அர்த்தமற்ற ஒப்பீடாகிறது‌.

கரூரில் பத்திரிகையாளர்கள் கேள்விகேட்க அப்படியே தலைதெறிக்க ஓடினார்.

முதலில் இந்த வழக்கு இன்னும் சி.பி.ஐ விசாரணையில் உள்ளது. மேலும் அங்கே கூச்சல் குழப்பத்தைத் தவிர்ப்பதற்காகவே உடனே அங்கிருந்து சென்றதாக திரு. விஜய் சொல்லியிருக்கிறார். அவர் உண்மையில் என்ன காரணத்தினால் பத்திரிக்கையாளர்களைச் சந்திக்காமல் சென்றார் என்பதை சி.பி.ஐ தான் சொல்ல வேண்டும்‌.

அதற்கு முன்னாலேயே, அந்த இடத்தில் அங்கே இல்லாத திரு. விநாயக முருகன் அவர்கள் எது சொன்னாலும் அது வதந்தியே.

இதுவரை ஒரு பத்திரிக்கை நிருபரும் அவரை சந்திக்கவில்லை. 

உண்மையில்லை. அவர்தான் எந்தப் பத்திரிக்கை நிருபரையும் சந்திக்கவில்லை. அதனால் எந்தப் பாதகமும் இல்லை.

எங்க அண்ணனுக்கு நான் பொண்டாட்டியா இருப்பேன் என்று ஒரு பெண் சொன்னார்.

அதை மகளிர் அணி கண்டிக்கவில்லை.

அந்தப் பெண் கூறியதை நானும் கண்டிக்கிறேன். மகளிர் அணி கண்டிக்காததும் தவறுதான். 

ஆனால், இந்த மாதிரி ஆட்கள் எல்லாக் கட்சி ஆதரவாளர்களிலும் இருப்பார்கள்.

ஆங்கிலம் பேசும் அனைவரும் புத்திசாலிகள் என்று பொதுமைப்படுத்துவது (stereotyping) எப்படியொரு சிந்தனையில்லாத செயலோ, அதைப் போலவே இந்தக் கட்சி ஆதரவாளர்கள் அனைவரும் தற்குறிகள் என்று பொதுமைப்படுத்துவதும் சிந்தனையற்ற செயலே.

தி.மு.க-வில் ஒரு வேட்பாளரே தற்குறித்தனமாகப் பேசினார். திருச்சி மாவட்டத்தின் மண்ணச்ச நல்லூர் தொகுதியில் வாக்கு சேகரிக்கும் போது, பொதுமக்களில் ஒருவர் எம்.எல்.ஏ திரு. கதிரவன் அவர்களிடம் கடந்த ஐந்து வருடங்களில் ஏதும் செய்து தரவில்லையென்று வாதிடுகிறார். அதற்கு அந்த எம்.எல்.ஏ "நீ எனக்கு ஓட்டு போட வேண்டாம். போதுமா?" என்று  சொல்லிவிட்டு நகர்கிறார். 

ஒரு தொகுதியில் வெல்லும் எம்.எல்.ஏ தனக்கு ஓட்டுப் போட்டவர்களுக்கு மட்டுமல்ல, தனக்கு ஓட்டுப் போடாதவர்களுக்கும் சேர்த்துதான் சேவை செய்ய வேண்டும். தனக்கு ஓட்டுப் போடவில்லை என்பதால் ஒரு குடிமகன் தன்னைக் கேள்வி கேட்கும் உரிமையை இழக்க மாட்டார். இந்த அடிப்படை ஜனநாயகம் கூடத் தெரியாதவர் தொண்டராக இல்லை, எம்.எல்.ஏ-வாகவே இருந்திருக்கிறார். வேட்பாளராக இருக்கிறார்.

அதற்காக தி.மு.க ஆதரவாளர்கள் எல்லாரையும் தற்குறிகள் என்று சொல்வது சரியாகாது.

ஆங்கிலம் மட்டுமல்ல. எந்தவொரு மொழி பேசுபவர்களிலும் முட்டாள்களும் புத்திசாலிகளும் கலந்தே இருப்பார்கள். 

த.வெ.க-வினர் அனைவருமே தற்குறிகளும் இல்லை. கம்யூனிஸ்ட்டுகள் அனைவரும் அதிமேதாவிகளும் இல்லை. 

ஐந்து வயது பசங்களை தூண்டிவிடுறது 

இதுவும் எழுத்தாளரது கருத்தே. அதாவது அவர்களைத் தூண்டிவிடுவது தற்குறித் தனமானது என்ற கூற்று எழுத்தாளரின் சொந்தக் கருத்து. 

இதைக் கேளுங்கள்.

ஈரோடு அரசு பொறியியல் கல்லூரி. அக்டோபர் 30, 2025.

அரசு நிகழ்ச்சி. கட்சிக் கரை வேட்டிகளுடன் ஆளுங்கட்சி எம்.எல்.ஏ- க்கள் வருகிறார்கள். 

"திராவிட மாடல்" ஆட்சி தொடர வாக்களியுங்கள் என்கிறார்கள். கட்சிப் பணத்தில், வீதியில் நடத்த வேண்டிய பிரச்சாரத்தை  - அரசுப் பணத்தில் அரசுக் கல்லூரியில் நடத்தினார்கள். அது அறமற்ற செயல்.

கோயம்புத்தூர். தேர்தலுக்கு முன்பான சில நாட்கள்.

தனக்கு ஓட்டு வரவேண்டும் என்பதற்காக மாலை நேரத்தில் மின்சாரத்தைத் துண்டித்து விட்டு ஒரு ஓட்டுக்கு 5000 தரும் கட்சிகள் புத்திசாலிகள் இல்லை.   

ஓட்டுக்கு லஞ்சம் கொடுப்பதால் வருவதை விடப் பெரிய பாதகம் குழந்தைகளிடம் ஓட்டுக் கேட்பதால் விளைந்திடாது.

இப்படி எல்லா தற்குறித்தனங்களையும் செய்த ஒரு அரசியல் மயப்படுத்தப்படாத வெறும் ரசிகர் மன்றத்தை...

த.வெ.க-வை மீண்டும் மீண்டும் இரசிகர் மன்றம் என்று சொல்வது அறிவீனம் மட்டுமல்ல. அந்தக் கட்சியை ஒரு கட்சியென்று அங்கீகரித்த இந்தியத் தேர்தல் ஆணையத்தையும் இழிவுபடுத்துவதாகும். 

தற்குறி கூட்டம் என்று சொல்லாமல் எப்படி சொல்வது?

சிந்தித்தால் விடை கிடைக்கும்.

விஜய்க்கு ஏன் ஓட்டு போட்டீங்கன்னு ஒருத்தரை கேட்டு பாருங்க. எனக்கு விஜயை பிடிக்கும். அதனால் ஓட்டு போட்டேன் என்று பதில் வரும். 

"தனக்கு எல்லாமே தெரியும்" என்பதையே இந்தக் கூற்று மூலம் திரு‌. விநாயக முருகன் நிறுவ முயல்கிறார்.

உத்தேசமாக, த.வெ.க-வுக்கு ஆயிரம் ஓட்டுகள் விழுகின்றன என்று வைத்துக் கொள்வோம். தமிழ்நாட்டின் எல்லா மூலையிலும் விரவியுள்ள அந்த ஆயிரம் பேரைப் பற்றியும் முழுமையாகத் தெரிந்து வைத்திருந்து, அவர்கள் எப்படியெல்லாம் சிந்திப்பார்கள் என்று தெரிந்திருந்தால் மட்டுமே ஒரு குறிப்பிட்ட கேள்விக்கு அவர்கள் என்ன பதில் சொல்வார்கள் என்று ஒருவரால் சொல்ல முடியும். அதிலும் அந்த ஆயிரம் பேரின் பதிலும் ஒரே பதிலாக இருப்பதற்கு சாத்தியக்கூறுகள் மிக மிகக் குறைவு.

நான் கூடத்தான் த.வெ.க-வுக்கு ஓட்டுப் போட்டேன். நான் என்ன காரணத்துக்காகப் போட்டேன் என்று நானாகச் சொல்லாமல் இவரால் சொல்லவே முடியாது. அப்படியிருக்க, இன்ன காரணத்துக்காகத்தான் ஓட்டு போட்டேன் என்று அவர்கள் சொல்லுவார்கள் என்று உறுதியாகச் சொல்லுவது சிந்தனைப் போதாமை.

தனக்கு எல்லாம் தெரியும் என்று நம்புவது மிக ஆபத்தானது.

எனக்கு கூடத்தான் ஷகீலாவை பிடிக்கும். 

இந்தக் கூற்று மூலம் எழுத்தாளர் என்ன சொல்கிறார்?

"எனக்கு கூடத்தான் ஷகீலாவைப் பிடிக்கும். அதற்காக அவருக்கு ஓட்டுப் போட முடியுமா?" என்று கேட்கிறாரா?

செல்வி. ஷகீலா என்றால் ஒன்றும் கேவலமானவர் இல்லை. 

செல்வி. ஷகீலா குடியுரிமை பெற்ற ஓர் இந்தியப் பிரஜை. அவர் கட்சி ஆரம்பித்தால் அதில் தவறில்லை. அப்படி அவர் கட்சி ஆரம்பித்தால் அவருக்கு ஓட்டுப் போடுவதும் தவறில்லை.

அவரது படங்களைப் பார்த்து அவரைப் பிடித்துப் போகும் திரு. விநாயக முருகன் அவர்கள் நாட்டை யார் ஆளலாம், யார் ஆளக்கூடாது என்று தீர்மானிக்கும் உரிமை தனக்கு இருப்பதாக நம்புகிறார். ஆனால், அதே சமயம் அந்தப் படத்தில் நடிப்பவர் அசுத்தமானவர், அவர் அரசியலுக்கு வரக் கூடாது என்றும் நம்புகிறார்.

"பிறப்பொக்கும் எல்லா உயிர்க்கும்" என்பது ஒரு கொள்கையாக அவருக்குத் தோன்றாமல் போனதில் ஆச்சர்யமில்லை.

ஒருத்தரை பிடிக்கும் என்பது வேறு. ஆனால் ஆட்சியை அதிகாரத்தை யாரிடம் கொடுப்பது என்பது வேறு.

உண்மைதான். 

நமக்குப் பிடித்தவர் என்ற ஒரே காரணத்துக்காக அவருக்கு அதிகாரத்தைத் தருவது என்பது எவ்வளவு அறிவீனமானதோ, நமக்கு பிடித்த ஒரே காரணத்துக்காக அவருக்கு நிர்வாகத் திறமை இருக்காது என்று நினைப்பதும் அதே அளவு அறிவீனமானது.

சமஸ் ஒரு பத்திரிகையாளர். அவர் ஏன் தொடக்கத்திலிருந்து இந்த ரசிகர் மன்றத்தை தூக்கிப்பிடிக்கிறார் என்று தெரியவில்லை. 

தெரியவில்லை என்றால் அவரிடம் விளக்கம் கேட்டு அறிந்து, அந்த விளக்கம் சரியா தவறா என்று பகுத்தறிந்து தெரிந்து கொள்ள வேண்டும். 

கரூரில் அந்த துயரம் நடந்தபோது அது சமூவத்தின் கூட்டுப்பொறுப்பு என்றார்.

எவ்வளவு கூட்டம் வருமென்று கணிக்கத் தவறிய உளவுத்துறை; போதிய இடமளிக்காத காவல்துறை; முண்டியடித்துக் கொண்டு செல்லக்கூடாது என்று உணராத மக்கள் கூட்டம் இவையெல்லாரோடும் சேர்த்து திரு. விஜய் அவர்களையும் உள்ளடக்கியதே சமூகம். அதைத்தான் அவர் சொல்கிறார்.

இப்போது தவெக என்ற ரசிகர் மன்றத்தை தற்குறிக்கூட்டம் என்று சொல்லக்கூடாது என்கிறார். 

அதில் என்ன தவறு? அவர்கள் தற்குறிகள் என்பது உங்கள் கருத்து (opinion). உண்மை (fact) இல்லை. உங்கள் கருத்தை வெளிப்படுத்த உங்களுக்கு உரிமை உண்டு‌. உங்கள் கருத்து தவறென்று சொல்வது அவரது கருத்து. அதைச் சொல்ல அவருக்கும் உரிமையுண்டு. 

தற்குறிகளை தற்குறின்னுதானே சொல்லமுடியும்? 

நிச்சயமாக. ஆனால், இந்த மாதிரி ஒரு பதில் எழுதி ஒருவர் இந்த எழுத்தாளர் மீது மான நஷ்ட வழக்குப் போடவும்‌ முடியும்.

விஜய் ஆட்சிக்கே வரட்டும். ஐந்து கோடி ஓட்டுகள் கூட பெறட்டும். ஆனால் என்னை பொறுத்தவரை நான் அந்த ஐந்து கோடி மக்களையும் தற்குறின்னுதான் சொல்வேன்.

கடந்த 2021 சட்டமன்றத் தேர்தல் முடிந்ததிலிருந்து 2026 தேர்தலுக்கு முன்பு வரை வாக்குரிமை பெற்றவர்கள் 18-லிருந்து 23- வயது வரை இருப்பார்கள். அவர்கள் சற்றேறக்குறைய 22 லட்சம் பேர்.

இந்த 18 - 23 வயதினர் மட்டும்தான் த.வெ.க.-வுக்கு ஓட்டுப் போடுவார்கள் என்று சொல்ல முடியாது. எழுத்தாளரின் வாக்குப் படி ஐந்து கோடி வாக்குகள்,  திரு. விஜய் அவர்களுக்குக் கிடைக்கிறது என்று வைத்துக் கொள்வோம். 

அப்படியென்றால், இந்தப் புதிய 22 லட்சம் பேரைத் தவிர மீதி 4 கோடியே 78 லட்சம் பேரும் அவரின் கணக்குப்படி 'தற்குறி' வகையறாவில் வருகிறார்கள். 

2021-ல் இந்த 4 கோடியே 78 லட்சம் பேரும் சேர்ந்து ஒரு அரசாங்கத்தைத் தேர்ந்தெடுத்தார்கள். தற்குறிகளால் தேர்ந்தெடுக்கப்பட்ட அந்த அரசாங்கமும் 'தற்குறி' அரசாங்கமே - எழுத்தாளரின் வாதத்தின்படி.

இன்னொரு உண்மை. அவருடைய வாதத்தின் படி, திரு. விநாயக முருகன் தற்குறி இல்லையென்பதால், எந்த ஒரு முறையுமே அவர் விரும்பிய அரசாங்கத்தின் கீழ் அவரால் வாழ முடியாது. வாய் மட்டும் பேசும் அதிமேதாவி என்பதைவிட,  நினைப்பதை நடத்திக் காட்டும் தற்குறியாய் இருப்பது சாலச் சிறந்தது.